van Maria Dübbers
Van kleïnop di Muëdersprook, dat Velbeder Platt on Huachdütsch te schnerweln, dat fuktioniert, wenn men twei Geschwester het , di elf on drütiën Johr äuler send on met sua nem kleïnen Sösterken alles Müëgleche aanstellen. Manche Utdröck en Velbeder Platt on gewesse Spröch hat ech alt em Uahr. Bruëder on Schwester gongen en de Schual on kalden met mech Huachdütsch. Üewer di Begewenheïten, van dennen ech heï vertällen well, het men tou döser Tied ömmer wiëder vertault, sua dat di Aflöüp fast en minnem Gedächtnes erhaulen send.
Ech wor tweienhalf Johr ault. Seït ca twei Monaten gong ech en de Kengerschual van St.Josef beï Schwester Albana und Fräulein Agathe. Do wor ech gän. Schwester Albana on Fräulein Agathe spelden met us, diëden us Geschechden vörlesen on wir mosden ouch sengen lieren. Sua hat ech völl Vermaak, denn te Hus wor ech jo alleïn. Muëder breit mech morges hen on diëd mech meddachs wiëder afholen.
Chreßdach 1928 stong vör der Düer. En der Kengerschual hat us Sankt Nikolaus met dem Hans Muff alt besökt. Di äuleren Kenger mosden sengen on ouch he¨on do en Gedecht opsagen. All woren se brav on de Hans Muff koun keïne Rute losweden. Ut dem gruaten Sack vom Nikolaus kregen wer dann all en Delschen geschenkt. Te Hus hadden wer am Vürowend nen Teller met nem Zettelken an den Kloos vör de Düer gestault, de us üewer Naih Äppel, Nüet, Spekelazius on en paar Süetechkeïten breit.
Jetz gong et grasch op Chreßdach aan. Völl Geschechden wuëden mech vertault. Min Geschwester sorchden ömmer för Spannong, of dat Chreßkengken us ouch nit vergeten köün on of wer us wat wönschen dorfden. Wenn wer en der Stadt woren woul ech ömmer en Rechtong Rohleder loupen. Dat wor en gruat Möbelgeschäft an der ongeren Friedrichstroot. Vör nem gruaten siegen Schaufenster met nem Geländer dovör kounen wir Kenger en dat Ongergeschoss kieken, wo en gruat Sortiment tem Beïspell an Poppen on Poppenwagen te bestaunen wor. Mech hat et jo en Poppenwagen met nem Pöppken aangedonn. Äwer met min tweienhalf Johr hat ech jo keïne gruaten Erwartongen. Koun men sech sua jet vam Chreßkengken wönschen? – Di stikumen Vörarbeïden bliëwen noch verborgen. De Chreßboum wor besorcht, vörbearbet on em Ständer em Keller verstoppt. Am Owend vör dem Heljen Owend kom he en de Stuëw, wuëd geschmöckt on di Stuëw blief dann bös 1. Chreßdach verschloten.
Iaschden Chreßdach: Muëder wor alt ganz fröüh opgestangen on hat den Owen en der Stuëw on den Häd en der Köch aangebüt. Em Parterr wor nen ca 3 m langen Flur, lenks dovan en Trapp no bowen en de Schlopzemmer. Vam Flur kom men en ne gruate Köch on van do ut en de Stuëw.. Onger der Trapp stong vör de Köch ne gruate Schrank, donewer en aule Waterbank (Aandenken an de Uroma) met nem Vüerhang dovör. Dat letzde, siege Stöck onger der Trapp wor freï. Mangs der Tied woren di angeren ouch ongen on hant Muëder geholpen. Teletzt het Muëder mech dann rongergeholt. De Koffedösch wor fädech on wir kounen Koffen drenken. Vader wor op eïnmol verschwongden. He hat sech stikum en de Stuëw engeschloten, nom Owen gekiëken on de Käzen aangemakt. On dann? Et Chreßkengken wor dogewesen. Vader nohm mech op den Arm. En ganz gruaten Chreßboum hat et gebreit, bös onger de Deck. On wat för schüene Saken dran hongen! Om Dösch logen noch Geschenke för alle on bongte Teller. Wat et Chreßkengken för mech gebreit hat log op nem kleïnen Döschken. Ech wor sua beendrockt, dat ech iascht ganz stell wor. Min Geschwester bekiëken dann min Saken, lenkden mech af gongen en de Köch, makden sech an dem Schrank em Flur te schaffen on ech ömmer hengerher. Dobeï han ech dann onger der Trapp jet entdeckt. Iascht koun ech dat garnit rechtech erkennen. Et wor nen Poppenwagen. Minnen iaschten kleïnen Poppenwagen hat et Chreßkengken för mech gebreit. Nen Bauermwagen ut Korf, Fahrgestell on Räder ut Hoult, bongt urgeschlagen on met nem aangetrockenen Pöppken dren.
Nu wor ech nit miah te haulen, ech sin no Vader on Muëder geloupen, iascht sua, dann met jet Hölp met dem Poppenwagen on han eïn op et angere Mol geruëpen: „Ich bin platt, ich bin platt.“ „Jo“, het di ganze Familje gesait: „do send wer äwer ouch platt.“