Üewerall em Strotenverkehr on an de Autos sooch men no de Schualferjen döse Schelder, öm an en mötige Fahrwies te mahnen. Wiëder gont de Gedanken op Reïs – ca achtzech Johr retour – on men süht di eïgene Enschualong vör sech.
1, Aprel 1932.
Met nem feinen Ledertornister op dem kleïnen Rökken, ech wor noch arich kleïn on noch keïn seß Johr ault. Em Tornister wor de Tafel, en höülterne Greffelduas met en paar Greffel dren, en Schwammdüesken, en Fibel on en Rechenbuëk. För et Iaschte dat Nüedechste. An der Sitt vam Tornester flatternden en Tafellappen, van Muëder ut witter Boumwoll met nem ruaden Rängken dröm gehekelt, em Wengd. Et wor di Tied der Bubiköpp. Fast siewenzich Prozent der Wetsches hadden nen Bubikopp, sua ouch ech.
Stiefstats, met nem fresch gestärkten Schöttschen üewer dem Kleïd on huëge Schnürschouhen, han ech mech kots op nem Beld wiërgefongen. Di Müeder breiten us no de Schual on gengen, nodem se us beï dem Schualmeïster afgeliëfert hadden, no Hus. No en Stongd of twei kounen se us afholen.
De Schualmeïster diët us all enzeln begrüeßen, wobeï wir usen Namen sagen mosden. Völl van us kangden sech alt van de Kengerschual beï Schwester Albana. – Wir kregen dann usen Platz tougewiesen on de Schualmeïster diët met us beden on en fromm Kerkenlied sengen.
Wie et dann widergon soul diët he us erklären on gof us den Stondenplan met.
Tem Afschloss des iaschten Schualdages wuëd noch en Lied gesongen. Dat wor nu de iaschte Schualdach. Mech hat et guët gefallen, manche Kenger woren äwer ouch am Hüllen on woulen nit miahr wiëderkuëmen.- Use Müeder stongen alt vör de Düer on luërden op us..
Kein Autoobjebot, keïn Omas, Opas, Onkel on Tanten on ouch keïne mordmäßig gruaten Schualtüten <Mein erster Schultag> wie vandaach. Schualtüten woren tou der Tied iahr seilen on wenn, dann völl klender – fast wie se de Kenger vandaach kriegen, wenn se en de Kengerschual kuëmen.
Dat iaschte Schriewen hant wer dann met Tafel on Greffel geliahrt. Eïgentlech praktesch. Wenn men en Woot verkiaht geschriewen hat, eïnfach Schwamm drüewer. Et geng äwer ouch einfach met jet Speï am Fenger. Söss wor dat Schriewen met dem Schiefergreffel nit sua eïnfach. Di Greffel broken grasch af. Dröm woren ouch ömmer en paar en der Duas on Owes diët Muëder di Greffel nohkieken on met dem Zoppenmetz aanspetzen.- De Ärger sadden sech fott, äs wer em Heft on met Bleïsteft schriewen mosden, nen Aanspetzer wuëd nüedech. Em dredden Akt komen Federhalter, Federn (Redisfedern van Brause) on Tinte ent Spell. Etzich mosden wer lieren met Feder on Tinte te schriewen. Di Tinte wor en sua Glaspöttsches met Deckel, di en di Pulte engeloten woren. Kleksereï on Schmerereï bliëwen nit ut. Füllfederhalter komen iascht völl läter draan on Kulis kangden men noch garnit. Minnen iaschten Füllfederhalter han ech äs Kommunionsgeschenk gekregen..- Dat wer en döser Tied noch met Feder on Tinte schriewen mosden, het us secher ouch bessere Hangdschreften engebreit. Schüenschriewen wuëd jo ouch noch benotet.
Äwer dat es dat Gejammer der mangs der Tied Ergrauden. Schiefertafel on Greffel fengt men mär noch en Museen. Vandaach süht di Enschualong angesch ut. Wie alt gesait, met gruatem Bahnhoff. En Disseinerklamotten, met ner gruaten bongten Plastiktonn op dem Krüz on met Schualtüten, dökkes grötter äs de I-Dotz selwer on Geschenke!!!. En Festakt,do makt men Ougen! Do hüllt nömmes, do heïscht et: Schule es cool.
Maria Dübbers