Suëmertied – Ferjentied
Erennerongen an min Kengertied von Maria Dübbers
Welten liegen dotöschen! Wenn men vandach hüert, wie wiet di kleïnen Kenger on besongesch di Schualkenger alt en der Welt römgekuëmen send, kömmt men ut dem Staunen nit erut. 3-4 jöhrige Kenger vertällen alt met vollem Äenst: „Wir fliegen im Urlaub nach Kreta. Ja, in Holland waren wir auch schon, auf Mallorca auch.“
Dobeï kuëmen mech dann di gruaten Schualferjen em Suëmer van fröüher en’t Gedächtnes. Meïstens verbreiten wer die Tied jo te Hus, wallens för kotte Tied beï Verwangten. Beste Muëder on –vader (Oma on Opa) han ech nit miah gekangt. Di Kenger, di noch Opa on Oma hadden on widder wech oder op dem Langd wonden, dorfden do die gruaten Ferjen verbrengen.
Manche fuhren met nem Knubben em Magen dohen, weïl Opa ömmer met gestrenger Miene wiëten woul, wie men en der Schual vöran kom on wie de Tügnesse utgefallen woren. En döser Tied wor Opa jo noch en Respektpersuan on weïl dat Tügnes seilen sinnen Aanspröchen genüchden, wor men frua, wenn di iaschde Hürde genohmen wor. Oma sorchden mangs der Tied för guëde Stemmong, döschden dat Liëwlengseten van Opa on van de Kenger op, on men koun dann alle Fröüden der Ferjen utlewen. Mech bliëw dat Reglemang erspart. Min letzte Bestemuëder es gestorwen, äs ech twei Johr ault wuëd.- Äwer wir hadden en den Schualferjen ouch völl Fröüd on di Tied wor meïstens te kott. Sua wie ech hen on wiëder Verwangde besökden, dorf ech en den Ferjen ouch alt ens Coseng oder Cosine enladen. En Fröngdin ut Magdeburg, di ech en der Kengerlangdverscheckong kennengeliahrt had, het ouch ens de Schulferjen beï us te Hus verbreit. Vader on Muëder makden dann herrleche Utflüög met us. Hefel – Hesperdal – Bernsmühle – Baldeneysee – Gruga – Berkendal – Mina Kern tem Kahnfahren – Bleibergquelle – Sonnborner Zoo, öm mär en paar van den völlen Müöglechkeïten te nennen. Heï on do hiëlen wer Enkehr en ner Gadeswiatschaft. Vader dronk sech en Biërken, Muëder en Köpken Koffen. On wir Kenger kregen en Rösken. En Bötterken hadden wer meïstens ouch dobeï.
Use herrlech gelegene Badeanstalt (Freïbad) wor tou der Tied alt en Attraktiuan. Et gof jo nit an jeder Eck Spielplätz, ouch keïne Freizeitparks oder gar en Waikiki-Spaßbad.- Äwer en Licht- on Luftbad hadden wer in Velbet, wo men sech jet sonnen, ens afbrausen on torneresch betätigen koun. Gän woren wer ouch te Hus. Em Gaden on en der Laube kounen wer herrlech spielen, besongesch ouch em nohgelegenen Offerbosch. Wer hant nix vermesst on hadden en glöckleche Kengertied.
On dröm es use Begeïsterong för dat niederbergesche Langd bös vandach erhaulen gebliëwen.